Category: Albisteak

EH Bilduk laurogei pertsona bildu ditu udal hauteskundeen gaineko asanblada ireki batean

Aza 22 2014

Atzo, ostirala, laurogei pertsona bildu ziren Ibaigane Kultur Etxeko sarrera-aretoan EH Bilduren asanblada irekian. Asanblada horren helburuak honakoak izan
ziren: 2011-2014 legegintzaldiaren balantzea egitea, 2015eko hauteskundeei begira udal programa osaketaren prozesu parte-hartzailearen eta hautagaien zerrendak osatzeko eman beharreko urratsen berri ematea.

Read more ...

Asanbalda irekia

Aza 14 2014

Asanblada

Basauriko terraza iraunkorren irregulartasunak Arartekora heldu dira

Aza 14 2014

Basaurin, 2014ko azaroaren 14an. EH Bilduk gaur txosten bat aurkeztu du Arartekoaren bulegoan. Horretan, Basauriko zenbait tabernaren terraza iraunkorrak arautzen dituen udal araudiaren gaineko ustezko ez betetzeak salatzen dira. Idazkiak agerian uzten du udal gobernuaren (EAJ) erabateko utzikeria hirigintza-irregulartasun hauen aurrean.

IMG_20141114_114209

Horregatik guztiagatik, koalizioaren ordezkariek idazki hori erregistratu dute. Gaurdainoko irregulartasun guztiak azaltzen dira. Irudiez gain, txostenak alkateari araudia betearazteko eginiko hiru eskariak agertzen dira. Udal ordezkariek ez dute kasurik egin, udal ordenantzak agintzen duen moduan, ez diete zigorrik jarri ustezko arau-hausleei.

EH Bilduk Arartekoak gai honetan zentzua jarriko duela espero du. Zentzuz jokatu, betebeharreko udal ordenantza ez betetze agerikoaren eta Udalaren utzikeriaren aurrean. Udalak babestu behar baititu herri zorua, herritarrek kale horiek gozatzeko duten eskubidea eta araudia bete egiten duten bestelako ostalarien eskubideak.

Sustraiak Fundazioaren gaineko ikerketa-batzordea deitzea lortu dugu

Urr 08 2014

Basaurin, 2014ko urriaren 8an. EH Bilduk eremu publikoan gardentasunez eta zintzotasunez jardun behar dela ezinbestekoa deritzo. Hori guztia lortzeko, konpromisoa, lana eta etengabe ekitea azaltzen dugu. Gainera, jarrera horrek bere fruituak ematen ditu: joan den irailaren 26an, PP eta PSOE-rekin batera, lortu genuen “Gobernu Organoen Kontrol Batzordea”-ren deialdia. Batzorde horretan, Sustraiak Fundazioan azaldutako irregulartasun eta utzikeria guztiak jorratu nahi ditugu. Horien atzean, kudeaketa eskasa, diru publikoaren ustezko erabilera desegokia eta kontrol eza egon daitezke.

Batzordea bildu bitartean, EAJ-n urduritasuna nabaria da. Atzoko, urriaren 7ko, Kultura, Euskera eta Hezkuntza Batzordean agerian geratu zen arloko zinegotziak, Nora Peredak, azaldu zuen irudi tamalgarria. Garrasika eta era oso desegokian, Sustraiak Fundazioaren kontuen eta jardueren gaineko ustezko kontrol ezari buruz oposizioko alderdiak engainatzen saiatu zen. Peredak auditoretzatzat aurkeztu nahi izan zituen memoriei buruzko txostenak. Aurpegi gogorra: Azal lodia.

Egun horretan, EAJ-k prentsa oharra bidali zuen hedabideetara, oposizioko alderdi guztien kontra eta gai ilun honen inguruan euren lana defendatuz. Ustezko “meritu” horien artean, 2012an Sustraiak Fundazioari auditoretzak egitearena dago. Baina ahaztu egiten dute, hori EH Bilduren proposamena izan zela, EAJ-ren legealdiaren lehenengo urteko aurrekontuen negoziazioaren barne zegoela alegia. Esandakoa, aurpegi gogorra.

Udal oposizio guztiak adostutako eta babestutako deialdi honen aurretik, EH Bilduk, Sustraiak Fundazioaren kontu eta ekintzei eginiko kanpoko auditoretzan agertutako irregulartasun nabariak ikustean, birritan eginda zeukan eskari hori –martxoan eta ekainean, hurrenez hurren-. Kasu guztietan EAJ-ren erabateko ezetzarekin aurkitu gara. Jarrera horrek adierazten du, gai hau gardentasunez ikertu nahi ez duela.

Azkenean lortu dugu. EAJ-k ez du irtenbiderik izan oposizioaren alderdi guztien gehiengoaren aurrean. PP-k eta PSOE-k ulertu dute azken hilabeteetan fundazioaren inguruan gertatutakoa larriegia dela (kontuetan irregulartasunak, jardueren aktak eta memoriak falta dira, patronatoaren berritze eza, Eusko Jaurlaritzari urtero kontuak aurkezteko obligazioa ez dute bete…). Nahikoak dira, azken urteetan izan diren erantzukizun poltikoak eta teknikoak zuritzeko asmoz prozesua hasteko.

EAJ-k ez du deitzen “Goberu Organoen Kontrol Batzordea” euren ekimenez, ohar horretan agerrarazi nahi duenez, oposizioak behartuta baizik. Bereziki, EH Bilduren lana eta ekiteagatik.

Galderak egiteko unea heldu da. Fundazioaren arduradunei, auditoretza egin duen enpresaren teknikariei, Andoni Busqueti (EAJ), Kultura zinegotziari -Nora Pereda (EAJ)-, udaleko beste kargu batzuei eta Jarraipen Batzordean udalaren ordezkariak izan diren guztiei.

EAJ-k, orain arte, ukatu digun eskatutako informazio guztia emateko unea heldu da.

Laburbilduz, heldu da momentua hau guztia argitzeko, erantzukizunak zuritzeko eta ezagutzeko zergatik ez den kontrolik egon udalak fundazioari emandako 1,2 milioi euroen gainean.

Udalak berriro ere euskara bazter utzi du udako kirol eskaintzan

Eka 18 2014

Basauriko Udalak, aurten berriro ere, euskara bazter utzi du Kiroldegiko (IMD-KUE) udako kirol eskaintzan.

Aurreko urteetan bezala, Kiroldegiak (KUE) udarako antolatutako kanpusean euskaraz aukera bakarra dago, multikirola hain zuzen ere; hori eskaintza guztiaren herena baino ez da, gainerako ekintza guztiak (gimnasia erritmikoa eta eskubaloia) gaztelaniaz baino ez dira eskaintzen eta.

Beraz, berriz ere aurtengo udan, Basauriko familien hizkuntz eskubideak mespretxatu egiten dira, eta euskara eskolaz kanpoko eremuetara eramateko aukera ezin hobea galtzen da, euskararen erabilera soziala oztopatuz.

EHBildu-k. herriko beste elkarte batzuek bezala, behin baino gehiagotan eskatu du foro desberdinetan, bai Euskararen Ahoku Batzordean, bai Euskara eta Kultura arloko Informazio Batzordean Basauriko umeen hizkuntz eskubideak berma daitezela, eta ekintzen eskaintzan euskararen gizarte erabilera sustatua izan dadila, bai kirol arloan, oraingoan bezala, zein kultura edo aisialdian.

Udal Gobernu Taldeak ordea, entzugorrarena egiten du, inora eramaten ez gaituzten marketing kanpainak bideratuz, euskara indartzeko benetako neurririk hartu gabe. Euskararen Aholku Batzordean gauza bat esan eta gero kontrakoa egiten dute.

Hori dela eta, Gobernu Taldeari eskatzen diogu egoera honi eta antzekoei berehalako konponbidea eman diezaien. Zer zilegitasun edo sinesgarritasun izango du Udalak elkarteei euskararen normalizazioaren aldeko lana egiteko eskatzen joateko, bere etxean bete beharrak egin gabe baditu?

Basauriko euskaldunok ez dugu zertan gehiago itxaron euskaraz bizitzeko, gure hizkuntza delako, gure eskubidea.